Гарачыня ў Беларусі будзе нарастаць, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

"Антыцыклон Zoe прынёс на тэрыторыю Беларусі цёплае сонечнае надвор'е. Да канца гэтага тыдня яго ўплыў захаваецца, дажджоў не чакаецца, а гарачыня будзе толькі нарастаць. Таму варта ўспомніць асноўныя правілы паводзін у гарачыню: не выходзьце без асаблівай неабходнасці на вуліцу падчас максімальнай сонечнай актыўнасці, а калі ўсё ж выходзіце, не забывайце пра галаўны ўбор і абавязкова вазьміце бутэлечку з вадой. На вуліцы лепш трымацца ў цені і перыядычна заходзіць у магазіны або памяшканні з кандыцыянерамі", - расказалі ў Белгідрамеце.

Тэмпература вады ў рэках і вадаёмах Беларусі складае плюс 18-23 градусы. Сіноптыкі рэкамендуюць быць уважлівымі і асцярожнымі падчас адпачынку каля вадаёмаў. "Акрамя таго, у сувязі з цёплым і сухім надвор'ем павялічваецца і клас пажаранебяспекі. Таму, адпраўляючыся ў лес, не выкідвайце падпаленыя акуркі, запалкі, не пакідайце на зямлі шкляныя бутэлькі", - дадалі ў Белгідрамеце.

У пятніцу, 18 чэрвеня, будзе без ападкаў. Вецер прагназуецца заходні, паўднёва-заходні ўмераны. Тэмпература паветра ўначы складзе 9-15 градусаў вышэй за нуль, удзень - 25-31 градус цяпла.

У суботу, 19 чэрвеня, таксама будзе без ападкаў. Вецер прагназуецца паўднёва-заходні ўмераны. Тэмпература паветра ўначы складзе 11-16 градусаў вышэй за нуль, удзень - плюс 27-32.

У нядзелю і панядзелак, 20-21 чэрвеня, будзе пераважна без ападкаў. Вецер прагназуецца паўднёва-заходні ўмераны. Тэмпература паветра ўначы складзе 13-18 градусаў вышэй за нуль, удзень - плюс 28-33.

У аўторак, 22 чэрвеня, будзе пераважна без ападкаў, толькі ўдзень у асобных раёнах па заходняй частцы краіны пройдуць кароткачасовыя дажджы, навальніцы. Тэмпература паветра ўначы складзе 13-20 градусаў цяпла, удзень - плюс 28-33.

У сераду, 23 чэрвеня, у асобных раёнах краіны пройдуць кароткачасовыя дажджы, навальніцы. Тэмпература паветра ўначы складзе 15-22 градусы цяпла, удзень - плюс 28-34.