Валанцёры БРСМ Гомельскай вобласці пачалі дабрачынны марафон "У школу з добрым сэрцам", паведамілі карэспандэнту БЕЛТА ў абкаме БРСМ.

Акцыя стартавала ў адным з буйнейшых гандлёвых цэнтраў Гомеля. Валанцёры атрада "Добрае сэрца" дапамагаюць сабраць канцылярыю, спартыўную амуніцыю і іншыя неабходныя для падрыхтоўкі да будучага навучальнага года рэчы. Гэтыя прадметы перададуць дзецям, якія апынуліся ў цяжкай жыццёвай сітуацыі.

Акцыя праводзіцца ў два этапы, растлумачылі ў абкаме. Першапачаткова валанцёры арганізуюць у буйных гандлёвых цэнтрах і магазінах рэгіёна пункты збору канцылярыі, вучэбных дапаможнікаў, школьнага адзення, абутку і інш. Таксама падарункі для школьнікаў усе неабыякавыя могуць прынесці ў тэрытарыяльныя камітэты БРСМ. Потым усе рэчы даставяць у сем'і дзецям, сацыяльныя прытулкі, якія маюць патрэбу ў дапамозе. Валанцёры таксама наведаюць дома дзяцей з абмежаванымі магчымасцямі, арганізуюць канцэрты ў дзіцячых інтэрнатных установах, уручаць падарункі іх выхаванцам.

"Вельмі прыемна, што з году ў год становіцца ўсё больш жадаючых дапамагчы і далучыцца да нашага дабрачыннага праекта. Акцыя на слыху, і жыхары вобласці ўжо самі шукаюць пункты збору, каб пакінуць падарунак людзям, якія трапілі ў складаную жыццёвую сітуацыю", - расказалі ў абкаме.

Валанцёрскі рух "Добрае сэрца" - адзін з вядучых напрамкаў дзейнасці Гомельскай абласной арганізацыі БРСМ. Ён аб'ядноўвае больш за 5 тыс. юнакоў і дзяўчат па ўсёй вобласці. Дабрачынны марафон стаў штогадовай традыцыяй. Мэта акцыі - адрасная сацыяльная падтрымка тых, хто ў ёй мае патрэбу. Гэта шматдзетныя, няпоўныя сем'і, а таксама тыя, хто трапіў у складаную жыццёвую сітуацыю, маюць цяжкасці пры падрыхтоўцы дзяцей да навучальнага года. Таксама ў фокусе ўвагі - інтэрнатныя ўстановы, над якімі шэфствуюць валанцёрскія атрады БРСМ "Добрае сэрца"