У Міністэрстве па надзвычайных сітуацыях 13 чэрвеня адбылася службовая нарада, удзельнікамі якой сталі намеснікі міністра, кіраўніцтва органаў, падраздзяленняў і арганізацый сістэмы МНС. Аб гэтым БЕЛТА паведамілі ў МНС.

На нарадзе разглядалі ўзровень гатоўнасці падраздзяленняў МНС да купальнага сезона, а таксама прафілактыку траўматызму і гібелі людзей на вадзе.

Паводле інфармацыі МНС, з пачатку года ў Беларусі патанулі 136 чалавек, з іх чатыры дзіцяці. Гэта на 28 працэнтаў больш, чым за аналагічны перыяд мінулага года. Пры гэтым у стане алкагольнага ап'янення знаходзіліся 43 чалавекі. Выратаваць удалося 69 чалавек, пяцёра з якіх - дзеці.

Як расказалі ў выратавальным ведамстве, пры купанні загінулі шэсць чалавек, пры падлёднай рыбалцы - дзесяць, пры рыбнай лоўлі з лодкі - шэсць, пры рыбнай лоўлі з берага - дзевяць чалавек. Акрамя таго, 32 чалавекі загінулі пры падзенні ў ваду, у тым ліку адно дзіця. Яшчэ 11 чалавек, уключаючы дваіх дзяцей, загінулі пры падзенні ў ваду з лёду. У час прыняцця ваннай загінулі восем чалавек, у тым ліку адно дзіця. Пры перакульванні маламернага судна загінулі два чалавекі. Па 52 выпадках утапленняў абставіны ўстанаўліваюцца кампетэнтнымі органамі, праводзяцца неабходныя экспертызы для ўстанаўлення іх прычыны.

Вадзім Сіняўскі акцэнтаваў увагу і на пытаннях пажарнай бяспекі. За пяць месяцаў гэтага года на тэрыторыі Беларусі адбыліся 2562 надзвычайныя сітуацыі тэхнагеннага характару, што на 6,9 працэнта менш, чым за аналагічны перыяд мінулага года. Пры 2556 пажарах загінулі 255 чалавек, яшчэ 259 былі траўміраваны.

Акрамя таго, на нарадзе разгледжаны пытанні забеспячэння пажарнай бяспекі ў экасістэмах. Нягледзячы на тое, што з пачатку года фіксуецца зніжэнне пажараў на 71 працэнт, з улікам умоў надвор'я рызыкі ўзнікнення лясных пажараў застаюцца высокімі. Міністр абазначыў неабходнасць узмацнення кантролю за станам пажарнай бяспекі ў лясах, асабліва напярэдадні выхадных. Для ранняга выяўлення ачагоў пажараў у лясных масівах задзейнічана авіяцыя МНС і прымяняюцца тэхналогіі дыстанцыйнага зандзіравання зямлі для выяўлення цеплавых анамалій.