Амаль 44 працэнты беларусаў лічаць, што ў бліжэйшай будучыні іх жыццё зменіцца да лепшага. Такія даныя тэлефоннага сацыялагічнага апытання карэспандэнту БЕЛТА прывёў намеснік дырэктара па навуковай і інавацыйнай рабоце Інстытута сацыялогіі Нацыянальнай акадэміі навук Беларусі Мікалай Сухоцкі.

Інстытут сацыялогіі Нацыянальнай акадэміі навук Беларусі з 8 па 22 лютага правёў тэлефоннае сацыялагічнае апытанне "Грамадская думка аб праблемах, што хвалююць насельніцтва". Выбарка - 900 рэспандэнтаў.

Рэспандэнтам прапаноўвалася адказаць на пытанне: як, на вашу думку, зменіцца ваша жыццё ў бліжэйшай будучыні?

"Зменіцца да лепшага" - так адказалі 43,6 працэнта рэспандэнтаў, "Застанецца без змяненняў" - 29 працэнтаў, "Зменіцца да горшага" - 8,9 працэнта. Не змаглі адказаць - 18,5 працэнта апытаных.

"Чаканні беларусаў, згодна з гэтымі данымі, адносна сваёй бліжэйшай будучыні дастаткова аптымістычныя. Падкрэслю, што тут трэба гаварыць менавіта пра бліжэйшую перспектыву: месяц, паўгода, год. Сёння ў прынцыпе складана будаваць доўгатэрміновыя планы. Дамінантная большасць - больш за 43 працэнты насельніцтва - лічаць, што іх жыццё зменіцца да лепшага. Гэты паказчык адлюстроўвае высокі ўзровень адаптацыі да існуючай вакол нашай краіны знешнепалітычнай сітуацыі, эканамічных выклікаў мінулага і бягучага года, а таксама існуючы ў грамадстве запыт на пазітыў, - адзначыў Мікалай Сухоцкі. - Адносна нізкая доля песімістаў - усяго толькі каля 9 працэнтаў - сведчыць пра значнае пераважанне аптымістычных установак у грамадзян. Акрамя таго, такое размеркаванне лічбаў можа быць яшчэ адлюстраваннем упэўненасці беларусаў у тым, што яны заўсёды могуць разлічваць на дапамогу дзяржавы, якая традыцыйна прытрымліваецца сацыяльна арыентаванага курсу ў пытаннях працаўладкавання, аховы здароўя, сацыяльнай падтрымкі, ільгот і гэтак далей".

Не змог адказаць амаль кожны пяты рэспандэнт - 18,5 працэнта. "Гэта пытанне можа выклікаць складанасці, таму што яно датычыцца будучыні чалавека, - удакладніў намеснік дырэктара. - Не важна, гэта будучыня далёкая ці блізкая. Мы гаворым аб тым, што яшчэ чакаецца. Таму заканамерна, што такая істотная частка насельніцтва не змагла даць канкрэтны адказ. Людзі, гаворачы пра будучыню, заўсёды будуць заканамерна зведваць цяжкасці з адказам".

"Практычна трэцяя частка - 29 працэнтаў - гаворыць пра адсутнасць змяненняў. Гэта таксама нядрэнны паказчык. Такія ўсярэдненыя ацэнкі сведчаць пра стабільнасць становішча грамадзян, выступаюць як пазітыўны маркер сітуацыі ў грамадстве. Рэспандэнты, якія выбіраюць такі адказ не столькі аптымісты, колькі рэалісты, якія гавораць, што на гэты момант іх усё задавольвае. І гэта ўжо нядрэнна", - дапоўніў Мікалай Сухоцкі.