Намеснік генеральнага дырэктара ДВА "Белэнерга" Андрэй Шэршань расказаў на круглым стале ў прэс-цэнтры БЕЛТА аб тым, чаму дачнікам неабходна забяспечваць вынасны ўлік электраэнергіі.

У рамках указа кіраўніка дзяржавы нумар 155 "Аб садоўніцкіх таварыствах" зацверджана палажэнне аб парадку перадачы ва ўласнасць Рэспублікі Беларусь ліній электраперадачы трансфарматарных падстанцый садоўніцкіх таварыстваў. Спецыялісты ДВА "Белэнерга" пачалі ўжо абследаванні электрасетак у садоўніцкіх таварыствах. Іх можна падзяліць на высакавольтныя сеткі (6-10 кВ), якія знаходзяцца за межамі ўчасткаў СТ або далёка ад іх, а таксама на праведзеныя непасрэдна па садоўніцкіх таварыствах і ўчастках,- 0,4 кВ. Высакавольтныя сеткі будуць прымацца ў фактычным стане, а сеткі 0,4 кВ павінны быць тэхнічна спраўнымі. Для перадачы сетак дзяржаве садоўніцкім таварыствам неабходна прадаставіць бесперашкодны доступ да абслугоўвання і забяспечыць вынасны ўлік, гэта значыць устаноўку электралічыльнікаў.

"У частцы вынасных улікаў многія старшыні садоўніцкіх таварыстваў вядуць гэту работу самастойна, таму што даводзіцца канстатаваць частыя факты нядобрасумленнага выкарыстання электраэнергіі. Калі ў цэлым гэтыя факты мінімізаваны, то ў садоўніцкіх таварыствах гэта даволі сур'ёзная праблема", - расказаў Андрэй Шэршань.

Вынасны прыбор уліку забяспечвае дакладнасць уліку колькасці спажытай электраэнергіі, напрыклад, на дачны домік. "Па-першае, ёсць гарантыя выключэння магчымасці крадзяжу электрычнай энергіі з-за пэўных тэхнічных абставін. Па-другое, гэта немалаважная зручнасць. Ніхто і ніколі не будзе прыходзіць у дом, таму што прыбор стаіць знадворку", - расказаў намеснік гендырэктара.

Ёсць і новая разнавіднасць прыбораў на ўлік - спліт-лічыльнікі. Гэта вымяральны прыбор, які ўстаноўлены на апоры (слупку) на вуліцы, а дома знаходзіцца невялікае табло, дзе бачна статыстыка спажывання. "Калі прыходзіць кантралёр альбо іншы супрацоўнік энергазабеспячальнай арганізацыі, то ён усе гэтыя даныя здымае дыстанцыйна альбо праз прыбор уліку", - растлумачыў Андрэй Шэршань.

Такі ўлік таксама дасць магчымасць дасягнуць задачы, якая рэалізуецца цяпер у цэлым па энергасістэме Беларусі. "Гэта далейшае аб'яднанне ў адзіную сістэму ўсіх таварыстваў, каб гэтыя даныя перадаваліся ў энергазабеспячальныя арганізацыі не толькі для аналізу і ўліку, але і перадаваліся ва ўсе разліковыя праграмы, напрыклад, для аплаты жыллёва-камунальных паслуг. Каб чалавек мог, зайшоўшы ў інтэрнэт-банкінг, убачыць паказанні за мінулы месяц і праз АРІП аплаціць рахункі. Для гэтага, вядома, спатрэбіцца перадача прыбораў уліку да нас на баланс, але гэта працэдура нескладаная", - рэзюмаваў спецыяліст.