Рэспубліканская акцыя МНС "Дзень бяспекі. Увага ўсім!" стартуе 27 лютага. Аб гэтым БЕЛТА паведамілі ў прэс-службе ведамства.

"Правільныя паводзіны ў выпадку пагрозы жыццю і ўменне арыентавацца ў складанай сітуацыі - важныя аспекты ў жыцці чалавека, - адзначылі ў МНС. - З мэтай папярэджання пажараў і гібелі людзей ад іх, а таксама навучання насельніцтва дзеянням па сігнале "Увага ўсім!" у Беларусі з 27 лютага па 24 сакавіка пройдзе акцыя "Дзень бяспекі. Увага ўсім!". Мерапрыемства прымеркавана да Сусветнага дня грамадзянскай абароны".

Акцыя пройдзе ў два этапы. Першы этап (з 27 лютага па 10 сакавіка) ахопіць усе ўстановы адукацыі. Ратавальнікі правядуць тут урокі бяспекі. Малышам у гульнявой форме растлумачаць, як не дапусціць надзвычайнай сітуацыі і як сябе паводзіць у выпадку яе ўзнікнення, пакажуць мультфільмы "Чарадзейная кніга МНС" і "Спецатрад 112". Старэйшым хлопчыкам і дзяўчынкам раскажуць аб асноўных прычынах пажараў, дзеяннях па сігнале "Увага ўсім!", а таксама нагадаюць аб захаванні правіл бяспекі ў перыяд вясенніх канікул. Падлеткі паўдзельнічаюць у квест-гульні "Надзвычайная сітуацыя" і паглядзяць пазнавальныя відэафільмы ад МНС. Пасля заняткаў адбудзецца вучэбная эвакуацыя.

Напярэдадні вясенніх канікул асаблівы акцэнт будзе зроблены на бацькоў, якім ратавальнікі падрабязна раскажуць аб надзвычайных сітуацыях з дзецьмі і прывядуць прыклады рэальных выпадкаў з іх удзелам. Таксама ў прафілактычнай праграме - прагляд відэафільмаў "Не пакідайце дзяцей адных" і "Цана імгнення", удзельнікам раздадуць наглядна-выяўленчую прадукцыю.

Другі этап акцыі запланаваны з 14 па 18 сакавіка. Ён будзе нацэлены на жыльцоў інтэрнатаў, працоўныя калектывы, наведвальнікаў месцаў масавага знаходжання. Так, жыльцоў інтэрнатаў навучаць дзеянням пры сігнале "Увага ўсім!", нагадаюць правілы паводзін пры пажары. У месцах сустрэч будзе арганізавана фотавыстаўка "Назаві прычыну", дзе ўдзельнікам прапануюць разгледзець фатаграфіі з месцаў рэальных пажараў у быце, назваць прычыны здарэння і паразважаць, як можна было пазбегнуць трагедыі.

У месцах масавага знаходжання людзей (кінатэатрах, гандлёвых цэнтрах) МНС разгорне інтэрактыўныя пляцоўкі: выстаўка згарэлых электрапрыбораў і дамашніх рэчаў, "Небяспека ў кватэры", "Бяспечная эвакуацыя", "Правілы паводзін у натоўпе", "Эвакуацыйныя знакі", "Экстранная дапамога" і іншыя. У цікавай і запамінальнай форме людзям раскажуць аб асноўных правілах бяспекі, прапануюць на практыцы прадэманстраваць дзеянні ў выпадку розных надзвычайных сітуацый. Усе ўдзельнікі акцыі атрымаюць яркую друкаваную прадукцыю - буклеты, брашуры, наклейкі, закладкі і календары.

Для жыхароў сельскіх населеных пунктаў таксама будзе падрыхтавана шырокая праграма. Так, у дамах культуры і на адкрытых пляцоўках пройдуць шырокамаштабныя мерапрыемствы "Скарбонка бяспекі". Свята бяспекі дапоўніць дэманстрацыя вопытаў "Пажарная лабараторыя" і "Маршруты апавяшчэння" (інфармацыя па бяспецы жыццядзейнасці будзе перадавацца праз гучнагаварыцелі пажарнай тэхнікі, якая праязджае па вуліцах).