У Беларусі створаны ўсе ўмовы для максімальнай рэалізацыі патэнцыялу жанчын, заявіў журналістам намеснік міністра працы і сацыяльнай абароны Валерый Кавалькоў, перадае карэспандэнт БЕЛТА.

"Дзяржава стварае ўсе ўмовы для таго, каб жанчыны ў нашай краіне маглі максімальна рэалізаваць свой патэнцыял. Гэта пацвярджаецца міжнароднымі рэйтынгамі. У адпаведнасці з глабальным індэксам "Жанчыны, мір і бяспека" Беларусь займае 37-е месца са 170 краін, апярэджваючы ўсе краіны СНД і шэраг краін ЕС. Па індэксе гендарнага разрыву Беларусь займае 36-ю пазіцыю сярод 146 краін. Пры гэтым па крытэрыі "эканамічны ўдзел і магчымасці" Беларусь заняла 4-е месца, - расказаў Валерый Кавалькоў. - За апошнія пяць гадоў істотна павялічылася роля жанчын на ўзроўні прыняцця рашэнняў. У Беларусі няма заканадаўча ўстаноўленых выбарчых квот для жанчын, але дасягнуты дэклараваны ў міжнародных дакументах паказчык па ўдзеле жанчын у працэсе прыняцця рашэнняў. У Нацыянальным сходзе Рэспублікі Беларусь доля жанчын складае 35,5 працэнта, хоць сярэдні сусветны паказчык - толькі 25 працэнтаў".

Адбыліся пазітыўныя змяненні і ў павышэнні эканамічнай самастойнасці жанчын, у стварэнні ўмоў для рэалізацыі іх патэнцыялу ў сацыяльна-эканамічнай сферы, адзначыў намеснік міністра. "Жанчыны шырока прадстаўлены ў дзяржаўным кіраванні. Жанчыны - дзяржаўныя служачыя ўсіх узроўняў кіравання складаюць больш за 70 працэнтаў. Пры гэтым на кіруючых пасадах вышэйшага звяна іх амаль 54 працэнты. Для рэалізацыі жанчынамі нараўне з мужчынамі права на працу ў рэспубліцы ствараюцца адпаведныя ўмовы. Пры гэтым удзяляецца асаблівы акцэнт рэпрадуктыўнай функцыі, і жанчынам забаронена работа на цяжкіх і небяспечных, а таксама на падземных работах", - падкрэсліў ён.

"На дзяржаўным узроўні прымаюцца рэальныя меры для павышэння статусу беларускіх жанчын, паляпшэння ўмоў працы, павышэння эканамічнай актыўнасці і аховы здароўя. Яны рэалізуюцца праз шэраг праграмных дакументаў. Перш за ўсё, гэта нацыянальны план дзеянняў па забеспячэнні гендарнай роўнасці. Сёння мы рэалізуем ужо шосты план. Дзяржаўная праграма "Рынак працы і садзейнічанне занятасці", дзяржаўная праграма "Здароўе народа і дэмаграфічная бяспека" - усе гэтыя дакументы накіраваны ў першую чаргу на пашырэнне эканамічных магчымасцей жанчын, на садзейнічанне жанчынам у развіцці прадпрымальніцтва", - дапоўніў Валерый Кавалькоў.