Сустрэча кіраўніка Адміністрацыі Прэзідэнта Ігара Сергяенкі з актывам БРСМ, якая адбылася 3 жніўня, нясе сур'ёзны пасыл: праз праекты і праграмы мы павінны бачыць патрыётаў Беларусі, якія маюць цвёрдыя перакананні і жаданне ўмацоўваць дзяржаўнасць, суверэнітэт і незалежнасць краіны. Аб гэтым заявіў журналістам першы сакратар ЦК БРСМ Аляксандр Лук'янаў па выніках сустрэчы, перадае карэспандэнт БЕЛТА.

Гэта было важнае мерапрыемства ў новым фармаце, калі актыў БРСМ запрасілі ў Адміністрацыю Прэзідэнта на сустрэчу з кіраўніцтвам. Адбыліся і вострыя дыскусіі, у тым ліку звязаныя з якасцю арганізацыйна-кадравай работы ў БРСМ. Размова ішла, у прыватнасці, аб цякучасці кадраў, на што Аляксандр Лук'янаў заўважыў: "Яшчэ ў савецкі час камсамол з'яўляўся ў пэўным сэнсе кузняй кадраў, той арганізацый, якая фарміравала фундаментальныя светапоглядныя асновы па ўмацаванні дзяржаўнасці. На БРСМ таксама ляжыць важнейшая задача па падрыхтоўцы кадраў. Якраз сёння прысутнічалі не толькі кіраўнікі цэнтральных органаў і абласных камітэтаў БРСМ, але і невялікіх пярвічных арганізацый, а таксама ВНУ. Яны дзяліліся вопытам, як можна ўдасканальваць сістэму, каб яна працавала эфектыўней, у тым ліку па падрыхтоўцы кадраў, выяўленні тых маладых людзей, якім неабыякава будучыня краіны, якія хочуць удзельнічаць па-за рамкамі сваіх службовых абавязкаў у грамадска-палітычным жыцці дзяржавы".

"Вельмі важна, што сабралася каманда, якая мабілізавана, нацэлена на вынік, - прадоўжыў ён. - Тая вялікая колькасць праектаў, якія рэалізуе БРСМ, садзейнічае раскрыццю маладзёжнага патэнцыялу. Сёння дзяржавай створаны неабходныя ўмовы. Мы разумеем значнасць, з якой кіраўніцтва краіны ставіцца да развіцця дзейнасці БРСМ".

Паводле слоў лідара арганізацыі, сустрэча ў Адміністрацыі Прэзідэнта дала магчымасць "зверыць гадзіннікі, расказаць аб праблематыцы, якая збіраецца ў маладзёжнай аўдыторыі, разам выпрацаваць у ходзе мазгавога штурму агульныя рашэнні, якія будуць садзейнічаць удасканаленню дзяржаўнай маладзёжнай палітыкі ў Беларусі".

"Мерапрыемства нясе сур'ёзны пасыл для ўсяго штатнага актыву: праз праекты і праграмы мы павінны бачыць патрыётаў нашай краіны, якія маюць цвёрдыя перакананні і жаданне ўмацоўваць нашы дзяржаўнасць, суверэнітэт і незалежнасць", - падкрэсліў Аляксандр Лук'янаў.