Больш за 50 працэнтаў стабальнікаў па ЦЭ пражываюць у райцэнтрах і сельскіх населеных пунктах, паведаміў журналістам намеснік міністра адукацыі Аляксандр Кадлубай, перадае карэспандэнт БЕЛТА.

"Школьнікі ўстаноў адукацыі як у сельскай, так і ў гарадской мясцовасці на даволі добрым узроўні справіліся з заданнямі. На карысць раённых цэнтраў, сельскай мясцовасці сведчыць колькасць работ, выкананых на максімальныя 100 балаў. Больш за 50 працэнтаў стабальнікаў знаходзяцца ў раённых цэнтрах і сельскіх населеных пунктах, што сведчыць аб добрым узроўні падрыхтоўкі школьнікаў з вёскі", - сказаў Аляксандр Кадлубай.

У прыватнасці, сельскія школьнікі лепш за гарадскіх выканалі заданні ЦЭ па гісторыі. Адзнаку 10 балаў на ЦЭ атрымаў кожны дзясяты сельскі школьнік, прычым у большасці выпадкаў размова ідзе пра прадмет "Беларуская мова".

На карысць аб'ектыўнасці ЦЭ сведчыць факт наяўнасці ў шэрага навучэнцаў нулявога рэзультату. "Найбольш верагодна, гэтыя вучні выбралі няправільную траекторыю пасля завяршэння 9 класа - ім трэба было разгледзець магчымасць паступлення ў сярэднія спецыяльныя або прафесійна-тэхнічныя ўстановы адукацыі", - адзначыў намеснік міністра. Аднак і яны змогуць прадоўжыць навучанне, будучы залічанымі ва ўстановы прафесійна-тэхнічнай адукацыі.

Аляксандр Кадлубай звярнуў увагу, што цэнтралізаваны экзамен разглядаўся не столькі як новая форма падагульняючай атэстацыі за курс 11-га класа, але як магчымасць глыбокага сістэмнага аналізу працэсаў, што адбываюцца ў сістэме адукацыі. Аналізаваліся ўзровень падрыхтоўкі педагогаў, пытанні, звязаныя з выданнем вучэбных дапаможнікаў, метадычным суправаджэннем адукацыйнага працэсу ў школах.