У "Белэнерга" нагадалі пра правілы бяспечных паводзін пры абрыве правадоў лініі электраперадачы. Рэкамендацыі апублікаваны ў Telegram-канале Belenergo, паведамляе БЕЛТА.

Каб пазбегнуць няшчасных выпадкаў, нельга дакранацца да абарваных правадоў ліній электраперадачы. Не трэба да іх набліжацца на адлегласць бліжэйшую за 8 м. Пры выяўленні звісаючага або абарванага провада, іскрэння, іншых прыкмет няспраўнасці электраўстановак трэба як мага хутчэй паведаміць аб гэтым дыспетчару электрасетак па тэлефоне 144. Да прыбыцця аварыйнай брыгады лепш застацца на месцы і папярэдзіць людзей, якія могуць наблізіцца да гэтага месца, аб пагражаючай ім небяспецы.

У Беларусі на змену гарачыні прыйшлі моцныя дажджы, якія суправаджаюцца парывамі ветру да 25-30 м/с. "У выніку неспрыяльных умоў надвор'я 7 жніўня была зафіксавана значная колькасць адключэнняў у асноўнай і размеркавальнай сетцы энергасістэмы. Найбольш пацярпелі рэгіёны Віцебскай, Мінскай і Магілёўскай абласцей. Асноўныя прычыны адключэнняў - навальнічныя перанапружанні, павышаная ветравая нагрузка, падзенне галін і дрэў, пашкоджванне апор і абрывы правадоў ліній электраперадачы", - расказалі ў "Белэнерга".

Энергетыкі аператыўна пачалі ўстараненне парушэнняў. Было задзейнічана больш за 1 тыс. работнікаў і каля 350 адзінак тэхнікі. За суткі спецыялісты аднавілі электразабеспячэнне ў 1829 населеных пунктах. Ліквідацыя наступстваў дрэннага надвор'я прадаўжаецца яшчэ ў 650 населеных пунктах.

Дарэчы, у Гомельскай вобласці аператыўна ліквідаваны наступствы навальнічнага фронту. У паўднёва-ўсходнім рэгіёне за суткі парушалася электразабеспячэнне 147 населеных пунктаў. Асноўнай прычынай адключэнняў стаў абрыў правадоў з-за падзення дрэў і ветравой нагрузкі. Да вечара 7 жніўня падачу электрычнасці аднавілі.